සිංගර් ශ්‍රී ලංකා යනු දේශීය නිෂ්පාදන ක්ෂේත්‍රය තුළ ක්‍රියාත්මක වන ප්‍රමුඛතම ආයතනයක් වන අතර එම ආයතනය දශක 6කට වැඩි ඉතිහාසයකට උරුමකම් කියයි. 1960 දශකයේ දී රත්මලානේ පිහිටි සිය කර්මාන්ත ශාලාවක දී ලෝක ප්‍රකට සිංගර් මහන මැෂිම නිෂ්පාදනය මගින් සිය ගමන් මඟ ඇරඹූ සිංගර් ශ්‍රී ලංකා සමාගම එතැන් සිට සිංගර් සන්නාමය යටතේ ශීතකරණ, රෙදි සෝදන යන්ත්‍ර, ගෘහස්ථ උපකරණ, ගෘහ භාණ්ඩ, කෘෂි නිෂ්පාදන සහ ඉංජිනේරු නිෂ්පාදන ආදී පුළුල් ක්ෂේත්‍රයක් පුරා සිය නිෂ්පාදන කළඹ විහිදුවීමට සමත් විය.
මෙරට පාරිභෝගික භාණ්ඩ ක්ෂේත්‍රයේ දැවැන්තයෙකු වන සිංගර් සමාගම දේශීය නිෂ්පාදන ප්‍රවර්ධනය වෙත අවධානය යොමු කිරීමට අරමුණු කළේ තවදුරටත් වර්ධනය වීමට මෙන් ම, දේශීය ආර්ථිකයට දායක වීම සඳහා ඇති අවස්ථාවන් හඳුනා මේ අරමුණිනි. මෙහි දී සිංගර් සමාගමේ දේශීය නිෂ්පාදන ශක්තිය හා එමගින් මෙරට ආර්ථිකයට ලැබෙන දායකත්වය පිළිබඳව අප හා සාකච්ඡාවට එක් වූයේ සිංගර් ශ්‍රී ලංකා සමාගමේ සමූහ ප්‍රධාන විධායක නිලධාරී, මහේෂ් විජේවර්ධන, කැලුම් කොස්පැලවත්ත සුජීව පෙරේරා සහ අරුණ කොළඹගේ යන මහත්වරුන් සමඟ වන අතර, පහතින් දැක්වෙන්නේ ඔවුන් සමඟ කළ සාකච්ඡාව ඇසුරින් නිර්මාණය කරන ලද ලිපියකි.
ප්‍රශ්නය – මහේෂ් මහත්මයා, අද වෙනකොට අපි හැමෝම ඉන්නෙ දැඩි ආර්ථික අර්බුදයක. ඔබගේ සමාගමට මෙම තත්ත්වය දැනෙන්නෙ කොහොම ද ?
ආර්ථික අවපාතයන් මධ්‍යයේ වුණත් අපගේ ව්‍යාපාරවල මෙහෙයුම් කටයුතු ඉතා සාර්ථකව පවත්වාගෙන යාමට අපි විවිධ පියවර අරගෙන තිබෙනවා. ඒ සඳහා අපට ප්‍රමාණවත් සම්පත් තිබෙන බවත් පැවසීමට කැමතියි. අපි නව ව්‍යවසාය සම්පත් සැලසුම් පද්ධතියක් ස්ථාපනය කරමින් ආයතනික මෙහෙයුම් කටයුතු විධිමත් කිරීමට වගේ ම අපගේ සේවක සේවිකාවන්ගේ අභිවෘද්ධිය සඳහාත් නව ආයතනික වටිනාකම් පද්ධතියක් හඳුන්වා දීමටත් කටයුතු කර තිබෙනවා. දේශීය නිෂ්පාදන කියන්නෙ අපගේ ප්‍රධාන ශක්තීන්ගෙන් එකක්. අපගේ නිෂ්පාදන පරාසය පුළුල් කිරීමටත්, නව නිපැයුම් හඳුන්වා දීමටත්, ඊට අමතරව සුළු පරිමාණ දේශීය නිෂ්පාදකයින්ට අවශ්‍ය සහයෝගය ලබා දීමටත් අපි නිරන්තරයෙන් කැප වෙනවා.
ප්‍රශ්නය – දේශීය නිෂ්පාදන තුළින් විරැකියාවට යම් විසඳුමක් ලබා දීමට හැකි වෙලා තිබෙනවා. මේ ගැන ඔබගේ අදහස ගැන කතා කළොත්…
ආර්ථික අර්බුදය සෑම කර්මාන්තයකට ම බලපා තිබෙන නිසා, රැකියා අහිමිවීම් සහ ආර්ථික දුෂ්කරතා නිර්මාණය වී තිබෙන බව අපි කවුරුත් දන්නා කරුණක්. දේශීය නිෂ්පාදන දිරිමත් කිරීම මගින් රැකියා අවස්ථා නිර්මාණය වෙන නිසා වර්තමාන තත්ත්වයට මුහුණ දීමට වඩාත් සාර්ථක ක්‍රමවේදයක් විදියට එය හඳුන්වා දීමට පුළුවන්. ඒ නිසා ආයෝජන හරහා දේශීය නිෂ්පාදන ශක්තිමත් කිරීම වගේ ම සුළු පරිමාණ ව්‍යාපාර හා දේශීය සැපයුම්කරුවන් වෙත සහයෝගය ලබා දීම ඉතා වැදගත්. මේ රටේ ක්‍රියාත්මක වන විශාලතම පාරිභෝගික භාණ්ඩ ජාලයක් වන සිංගර් ශ්‍රී ලංකා සමාගම නිසා පවුල් 10,000කට වැඩි සංඛ්‍යාවක් යැපෙන බව පැවසුවොත් මම නිවැරදියි. මේ වෙනකොට අපි සෘජු හා වක්‍ර රැකියා අවස්ථා දහස් ගණනක් උත්පාදනය කර තිබෙනවා. ඒ වගේ ම බොහෝ දේශීය සැපයුම්කරුවන් හා නිෂ්පාදකයින් සිදුකරන දේශීය නිපැයුම් පුළුල් කිරීමට අපි නිරන්තරයෙන් සහයෝගය ලබා දෙනවා.
ප්‍රශ්නය – කැලුම් මහත්මයා, සිංගර් ශ්‍රී ලංකා සමාගම නිපදවන ශීතකරණ හා රෙදි සෝදන යන්ත්‍ර නිෂ්පාදන ක්‍රියාවලියේ විශේෂත්වය ගැන කතා කළොත්…
සිංගර් ශ්‍රී ලංකා කියන්නෙ ශීතකරණ සහ රෙදි සෝදන යන්ත්‍ර නිෂ්පාදනයේ ප්‍රමුඛතම සමාගමක්. අපි දැනටමත් මේ රටේ ශීතකරණ ඉල්ලුමෙන් 45%ක් සහ රෙදි සෝදන යන්ත්‍ර ඉල්ලුමෙන් 33%ක් ආවරණය කිරීමට සමත් වෙලා තිබෙනවා. සිංගර් සහ සිසිල් කියන්නෙ ශීතකරණ හා රෙදි සෝදන යන්ත්‍ර සම්බන්ධයෙන් වඩාත් ජනප්‍රිය වෙළෙඳ නාම දෙකක් විදියට හඳුන්වා දෙන්න පුළුවන්. අප සමාගම සතු සුවිශේෂී පර්යේෂණ හා සංවර්ධන ඒකකය නිසා නිෂ්පාදන ක්‍රියාවලියේ දී අති නවීන තාක්‍ෂණය යොදා ගැනීමට, නිෂ්පාදන වැඩිදියුණු කිරීමට සහ නව නිපැයුම් හඳුන්වා දීමට අවශ්‍ය තාක්ෂණයෙන් සහ හැකියාවෙන් අපි සන්නද්ධයි. අපගේ ශීතකරණ නිෂ්පාදන ක්‍රියාවලියේ තවත් ප්‍රධාන විශේෂත්වයක් විදියට ක්ලෝරෝ ෆ්ලෝරෝ කාබන් වායුව (CFC) නිකුත්වීමකින් තොර ශීතකරණ හඳුන්වා දුන් දකුණු ආසියාවේ ප්‍රථම සමාගම බවට පත්වීම සහ 100% පරිසර හිතකාමී නිෂ්පාදන හඳුන්වා දීම දැක්වීමට පුළුවන්. ඒ වගේ ම ශ්‍රී ලාංකික ජනතාව අපගේ නිෂ්පාදන මිලදී ගැනීමට වැඩි කැමැත්තක් තිබෙන බව ප්‍රකාශ කරන්නෙ මහත් ආඩම්බරයෙන්. ඒ වගේ ම සිංගර් සමාගමේ ආරම්භයේ ඉඳල මේ දක්වා ශීතකරණ මිලියන එකහමාරකට වැඩි ප්‍රමාණයක් අපි නිෂ්පාදනය කරල තිබෙනවා.
ප්‍රශ්නය – ඊට අමතරව, සිංගර් සමාගමේ දේශීය නිෂ්පාදන ශක්තීන් පිළිබඳව පැහැදිලි කරන්න පුළුවන් ද ?
සිංගර් ශ්‍රී ලංකා සමාගමේ දේශීය නිෂ්පාදන අංශය පුළුල් නිෂ්පාදන පරාසයක් සහ විශාල පාරිභෝගික භාණ්ඩ ජාලයක් දක්වා විහිදිලා තිබෙනවා. නමුත් සිංගර් සමාගම මේ වෙනකොට ජාත්‍යන්තර මට්ටමේ ශීතකරණ, රෙදි සෝදන යන්ත්‍ර, මහන මැෂින්, කෘෂි උපකරණ සහ ගෘහ භාණ්ඩ ආදිය නිෂ්පාදනය කරන, මහාපරිමාණ දේශීය නිෂ්පාදනායතනයක් බව පැවසිය යුතුමයි. අපගේ සියලු ම නිෂ්පාදනාගාර අති නවීන යන්ත්‍ර සූත්‍ර සහ උපකරණවලින් සමන්විතයි. නිෂ්පාදන ක්‍රියාවලිය විධිමත් කිරීම සඳහා අති දක්ෂ හා පළපුරුදු කාර්මික ශිල්පීන් අප සතුයි. ඒ වගේ ම අපගේ ශක්තිමත් පර්යේෂණ හා සංවර්ධන ඒකකය මගින් ගෝලීය ප්‍රමිතීන්ගෙන් යුත්, උසස් තත්ත්වයේ නිෂ්පාදන වෙළෙඳපොළ වෙත හඳුන්වා දීමේ හැකියාව අපට ලබා දෙනවා. ඊට අමතරව, දේශීය නිෂ්පාදකයින් සමඟ අපි සහයෝගයෙන් කටයුතු කරන නිසා ම අපගේ නිෂ්පාදන කළඹ පුළුල් කිරීමට හැකියාව ලැබී තිබෙන බවත් පැවසීමට කැමතියි.
ප්‍රශ්නය – අරුණ මහත්මයා, දේශීය නිෂ්පාදන හා රැකියා අවස්ථා ප්‍රවර්ධනයට ඔබගේ අංශය දක්වන දායකත්වය ගැන විස්තර කරන්න පුළුවන් ද ?
සිංගර් ඉන්ඩස්ට්‍රීස් ආයතනය මගින් ප්‍රධාන වශයෙන් සිංගර් මහන මැෂින් නිෂ්පාදන කටයුතු සිදු කරන්නෙ අති නවීන නිෂ්පාදන පහසුකම් සහිත කර්මාන්තශාලාවල වීම විශේෂිතයි. ඒ වගේ ම මෙම අංශය හරහා සේවක සේවිකාවන් 100 කට වැඩි පිරිසකට සහ සේවා නියෝජිතයින් 150 කට අධික පිරිසකට රැකියා ලබා දීමට අපට හැකි වෙලා තිබෙනවා. සිංගර් ඉන්ඩස්ට්‍රීස් මගින් උසස් තත්ත්වයෙන් යුත් සෝෆා සහ ගෘහ උපකරණ නිෂ්පාදනයේත් නිරත වෙනවා. මෙම නිෂ්පාදන ක්‍රියාවලිය සඳහා අපි අමුද්‍රව්‍ය ලබා ගැනීම සිදුකරන්නේ දේශීය සැපයුම් කරුවන්ගෙන්. ඒ වගේ ම මෙම නිෂ්පාදන සියල්ලක් ම එකලස් කිරීම සිදු කරන්නෙ අපගේ ම නිෂ්පාදන කර්මාන්තශාලා පරිශ්‍රයේ දී වීම විශේෂිතයි. අපි දැනටමත් ජාතික ශ්‍රම බලකායට විශාල දායකත්වයක් ලබා දීල තිබෙන බව පැවසීමට කැමතියි. ඒ වගේ ම ඉදිරියේදීත් දේශීය නිෂ්පාදන ක්‍රියාවලිය පුළුල් කරමින්, වැඩි රැකියා අවස්ථා ප්‍රමාණයක් නිර්මාණය කිරීමට අපි නිරන්තරයෙන් කැපවෙනවා.
ප්‍රශ්නය – සිංගර් සමාගම දේශීය නිෂ්පාදකයින්ට, සුළු පරිමාණ ව්‍යවසායකයින්ට සහ ස්වයං රැකියාවල නිරතවන අයට ලබා දෙන සහයෝගය ගැන කතා කළොත්…
දේශීය නිෂ්පාදකයින් සහ ස්වයං රැකියාවල නිරත වන්නන් ඇතුළු සිංගර් සමාගම සමඟ කටයුතු කරන පාර්ශ්වයන් වෙත විශ්වසනීය ආදායමක් හා අඛණ්ඩ ව්‍යාපාරික පැවැත්මක් සහතික කිරීමට අපි කටයුතු කරනවා. ඒ වගේ ම ඔවුන්ගේ ව්‍යාපාර දියුණු කර ගැනීමට අවශ්‍ය දැනුම සහ නිෂ්පාදන ක්‍රියාවලියේ දී උසස් ප්‍රමිතීන්ට අනුකූල වීම සඳහා අවශ්‍ය පුහුණුව ලබා දීමටත් අපි කටයුතු කරනවා. ඒ වගේ ම ඔවුන් සමඟ සමීපව කටයුතු කරමින්, ඔවුන්ගේ ව්‍යාපාර සාර්ථක කරගැනීම සඳහා අවශ්‍ය මගපෙන්වීම සහ තාක්ෂණික සහාය නිරතුරුවම ලබා දෙන සිංගර් සමාගම නිපුණ ශ්‍රම බලකායක් නිර්මාණය කිරීමට දායක වෙමින් දේශීය සැපයුම්කරුවන් ව්‍යාපාරිකයින් බවට පත් කිරීමට සහයෝගය ලබා දෙන බව පවසන්නේ මහත් ආඩම්බරයෙන්. ඒ වගේ ම අපි ඉදිරියේ දී අපගේ දේශීය නිෂ්පාදන ක්‍රියාවලිය තවත් පුළුල් කරමින් ජාතික ශ්‍රම බලකායට වැඩි දායකත්වයක් සැපයීමට බලාපොරොත්තු වන බවත් පැවසීමට කැමතියි.
ප්‍රශ්නය. – සුජීව මහත්මයා, ඔබගේ නිෂ්පාදන අංශයට දේශීය සැපයුම්කරුවන්ගෙන් ලැබෙන සහයෝගය ගැන කතා කළොත්…
පිළියන්දල ප්‍රදේශයේ පිහිටා තිබෙන සිංගර් ශ්‍රී ලංකා කර්මාන්තශාලා සංකීර්ණය මගින් ගෘහ භාණ්ඩ, සහ ජල පොම්ප නිෂ්පාදනය කිරීම සිදු කරනවා. වර්තමානයේ දී ගෘහ භාණ්ඩ නිෂ්පාදනය සඳහා අවශ්‍ය වන දැව සහ ජල පොම්ප නිෂ්පාදනයට අවශ්‍ය ලෝහ ඇතුළු අමුද්‍රව්‍ය සපයන දේශීය සැපයුම්කරුවන් 125 ක් පමණ අප සමඟ සම්බන්ධ වෙලා සිටිනවා. හොඳින් ස්ථාපිත සැපයුම් ආයතන වගේ ම මුල් අවධියේ ක්‍රියාත්මක වන සැපයුම් ආයතනත් මෙම සැපයුම් කරුවන් අතර සිටිනවා. ඒ නිසා සිංගර් සමාගම වැනි ස්ථාවර ආයතනයක් සමග ව්‍යාපාරික කටයුතු සිදු කිරීම තුළින් සාර්ථක ව්‍යාපාරයක් ගොඩනඟා ගැනීමේ හැකියාව ඔවුන්ට ලැබෙන බව පැවසුවොත් මම නිවැරදියි.
ප්‍රශ්නය – රටේ ආර්ථිකය ශක්තිමත් කිරීමට දේශීය නිෂ්පාදන අංශය ප්‍රවර්ධනය කිරීම ඉතා වැදගත්. දේශීය නිෂ්පාදන ක්ෂේත්‍රය පුළුල් කිරීම සම්බන්ධයෙන් ඔබගේ අනාගත සැලසුම් මොනවා ද?
දේශීය නිෂ්පාදන ක්ෂේත්‍රය ශක්තිමත් කරමින් අපගේ නිෂ්පාදන කටයුතු ඉහළ නැංවීමට වගේ ම නව නිෂ්පාදන වෙළෙඳපොළ වෙත හඳුන්වා දීමටත් අපි සැලසුම් සකස් කරමින් සිටිනවා. දේශීය හා ගෝලීය වෙළෙඳපොළ අවශ්‍යතා හඳුනාගෙන නව නිපැයුම් හඳුන්වා දීම කාලීන අවශ්‍යතාවක්. ඒ වගේ ම එම ක්‍රියාවලිය හරහා අපනයන වෙළෙඳපොළ අවශ්‍යතා ආකර්ෂණය කරගැනීමේ හැකියාවත් අපට ලැබෙනවා. දේශීය නිෂ්පාදනය තුළින් ආර්ථිකයට ලබා දීමට හැකි දායකත්වය අති විශාලයි.